Новиот материјал на најуспешниот македонски електронски изведувач Кирил Џајковски во форма на албумско остварување со наслов „Мемори парадокс“ (Memory Paradox) ќе излезе за неколку месеци под етикетата на издавачката куќа „Филтер лабел“ и ќе содржи дел од дваесетината нови песни на кои Џајковски работеше со неговите соработници изминатите две години.

Како најава за новиот албум, од 16 јануари на сите дигитални музички сервиси е достапен првиот сингл „Хед хај“ (Head High). Песната претставува уникатен спој на хип-хоп и драменбејс, а на неа Џајковски е придружуван од редовната соработничка и миленичка на македонската публика, ТК Вондер (TK Wonder).

„Хед хај“ е актуелна, ангажирана песна, која се занимава со универзални теми, како соочувањето со предрасудите, вербата во себе и борбата против нееднаквоста.

Иако досега не беше објавена, „Хед хај“ за кратко време стана една од омилените песни на фестивалските настапи на Џајковски и е секогаш одлично прифатена од публиката. Токму поради тоа е избрана да биде прв сингл од албумот „Мемори парадокс“.