Поранешниот директор на Државниот пазарен инспекторат, Стојко Пауновски, со народната поговорка „што си посеал, тоа ќе си жнееш“ во изјава за „Фокус“ го коментира поразот на СДСМ на локалните избори.

Пауновски беше разрешен од функцијата затоа што се спротивстави и одби да прими 35 „рамковни“ административци во Пазарниот инспекторат поради несоодветно образование. Откако Пауновски одби да ги прими „рамковните“, премиерот Зоран Заев му порача дека „пркос“ не е дозволен, дека мора да се почитува хиерархијата, по што Пауновски беше разрешен на владина седница.

Пауновски, за разлика до старо-новиот градоначалник на Куманово, Максим Димитриевски, не беше исклучен од СДСМ, но по неговото разрешување, тој коментираше дека СДСМ станала приватна партија, а тој бил нејзин член од нејзиното основање од 1991 година.

Димитриевски, пак, беше исклучен од партијата откако објави дека се кандидира за нов градоначалнички мандат во Куманово како независен кандидат. Пауновски вели дека му честитал на Димитриевски.

– На Максим му честитав и за старо-новата градоначалничка функција, а посебно за сѐ она што го издржа за овие избори, вели Пауновски за „Фокус“.