По една недела лесно запознавање со првите училишни обврски, низ цела Србија следуваше вистински час, а на почетокот на оваа недела и тестирање. Резултатите велат дека првите впечатоци не се добри. Српските медиуми пишуваат дека ова лето учениците го имале најдолгиот училишен распуст досега, бидејќи учебната година заврши предвреме поради големата трагедија во училиштето „Владислав Рибникар“.
Во таа ситуација никој не можеше да се концентрира на учење, ниту тоа беше приоритет во тој момент, но евидентно е дека српските ученици секоја година знаат се помалку.

– Мојот впечаток е просечен, многу работи заборавија и треба да се вложи многу труд, има многу пропуштен материјал од крајот на минатата година и треба да се вгради во сегашните планови. На наставниците не им е лесно, а не знаат на најдобар начин да го надополнат сето она што е пропуштено- вели Бранка Поповиќ, професорка во ЕТШ „Никола Тесла“.

Според неа, децата изгубиле многу во однос на стекнувањето знаење за време на епидемијата на корона вирусот.

-За време на корона, материјалот беше збиен, се работеше на интернет, сето тоа беа значајни отежнувачки околности кои во никој случај не треба да се игнорираат. Како и дали децата ќе можат да го надоместат тоа зависи од напорите на наставниците. Она што е евидентно е дека знаењето на децата е се помалку- објаснува Поповиќ.

Средношколците не се мотивирани да учат

Таа се осврна и на фактот дека децата во средните училишта се многу помалку заинтересирани да научат нешто. И таму родителите не можат многу, од наставниците зависи дали ќе успеат да ги мотивираат да учат. Таа посочи дека тоа би значело дека просветните работници во основните и средните училишта ќе имаат една недела на почетокот на учебната година во која ќе го обноват материјалот од претходните години.
Сузана Мијушковиќ, наставничка во ОУ „Николај Велимировиќ“ во Шабац и претседател на Здружението на наставници, вели дека нејзиниот личен впечаток како наставник е одличен.

-Одлично ја завршија работата со мајчиниот јазик. Како наставник задоволна сум од знаењето што го стекнаа во трето одделение. И математиката се работеше како што треба. -вели Мијушковиќ.

Таа вели и дека ситуацијата е поинаква во средните училишта.

-Како што слушаме од нашите колеги од средните училишта, децата масовно давале празни тестови. Едноставно не им е важно, бидејќи не добиваат оценка што се брои во просекот. Жално е што децата денес учат се повеќе за оценки отколку за знаење, наместо да сфатат дека „стекнувањето знаење им е од голема помош во иднина- заклучува таа.

Основците подобри од средношколците

Според Дејан Анѓелковиќ, директор на ОУ „Кизур Иштван“ од Суботица, наставниците не се целосно задоволни, бидејќи знаењето секогаш е послабо по подолга пауза.

-Верувам дека, како и претходните години, резултатите се 50:50, 50 проценти од децата секогаш имаат знаење на задоволително ниво, додека другата половина треба да го зајакне своето знаење и да го обнови материјалот- вели Анѓеловиќ.

Мирјана Стевановиќ, директорка на ОУ „Матко Вуковиќ“ во Суботица, вели дека според наставничката по историја во ова училиште ситуацијата е таква што „штом тестот не се оценува, резултатите се послаби“.

-Учениците ги интересира само оценката. Треба да се работи на мотивацијата за стекнување знаење поради знаењето и општата култура. Околу 90 проценти од материјалот се заборава за време на распустот. На почетокот на учебната година на децата секогаш им треба повеќе време за да „отвори папки- вели Мирјана.

За разлика од нив, наставниците во средните училишта не се толку задоволни од резултатите од првите првични тестови.
Како пример за неподготвеност изнесуваат податоци од тест по географија во средно училиште во Ваљево каде на прашањето „на која страна на светот гледаш кога изгрева сонцето“, дури 70 проценти од класот не знаеле дека точниот одговор е исток.