По вчерашниот пораз на Вардар од Рига, македонскиот фудбалски шампион Шкендија вечерва ќе го одигра својот прв натпревар од третото квалификациско коло во Конференциската лига. Противник на тетовскиот состав е словенечки Браво, а натпреварот ќе се одигра во Љубљана.

Со цел максимално да се адаптира на условите пред важниот европски предизвик, Шкендија во словенечката престолнина пристигна два дена порано и одработи два тренинга на стадионот „Стожице“, каде што ќе се игра средбата.

Тренерот Артим Положани на располагање ќе ги има и новите засилувања Марко Ѓорѓиевски и Јован Манев, додека поради различни причини нема да може да смета на голманот Бабакар Гаје и дефанзивецот Малиќи.

Дополнителен оптимизам за тетовци носи фактот што летните подготовки ги реализираа токму во Словенија, каде што одиграа и контролни натпревари против Копер и Целје, па добро се запознаени со условите во оваа земја.

Положани пред натпреварот истакна дека Браво е дисциплинирана и физички моќна екипа, која знае како тактички да ги искористи своите квалитети.

„Браво е квалитетен тим, тим кој дефинитивно го има своето најсилно оружје во физичката подготвеност, тоа е тим кој игра тактички добро, тоа е тим кој игра со брзи транзиции, на кои дефинитивно мора да преземеме мерки и да одговориме со добар или одличен пристап“, изјави Положани.

Натпреварот меѓу Браво и Шкендија е закажан за вечерва со почеток од 20:45 часот.

Ристовски разочаран од посетеноста на роденденот на Вардар: Во Македонија исчезнува навиката да се биде на трибина

Ристовски разочаран од посетеноста на роденденот на Вардар: Во Македонија исчезнува навиката да се биде на трибина