При асфалтирањето на улицата „Козара“ во скопската општина Центар, изведувачот ги покрил со асфалт и шахтите и сливниците. По објавувањето на случајот, денес на улицата дојде градоначалникот Горан Герасимовски со екипа од општината, која ги „ослободуваше“ шахтите од асфалтната покривка.

Но, граѓанската иницијатива Шанса за Центар, која е дел од општинскиот совет, попладнево реагира дека шахтите и натаму не се добро санирани, како и дека во дел од сливниците паднал материјал, кој може да предизвика проблеми и поплавување дури и при помал дожд.

„По информацијата од граѓаните вчера се обративме и до Општината од каде како одговор добивме две фотографии од средени сливници. Но, денеска се уверивме дека состојбата на улицата не е сосема како во тие два случаи. Дел од сливниците и повеќе шахти не се уште расчистени од асфалтот. Кај некои сливници внатре може да се види дека паднал дел од материјалот. Сето ова може да предизвика големи проблеми доколку заврне дожд“, велат од Шанса за Центар.

„Инсталацијата на улицата нема да може да прими многу од водата како што би требало па може да дојде до поплава и при мали количини на вода.
Денеска се обративме повторно до општината да се преземат мерки за брзо да се расчисти состојбата пред повторно да дојдат дождливи денови“, додаваат од граѓанската иницијатива.