Викендов полицијата во повеќе македонски градови уапси вкупно петмина луѓе кои своите возила ги управувале под дејство на алкохол, а највисок измерен резултат кај еден возач бил 3,15 промили алкохол во крвта, информираат од МВР.

Рекордот за викендов го постигна велешанец, кој вчера со 3.15 промили алкохол во крвта изгубил контрола над возилото и удрил во објект, по што бил пронајден и уапсен од страна на полициски службеници.

Во Куманово, пак, денеска кратко по полноќ, полицијата сопрела „лада нива“ и измерила 1,62 промили алкохол во крвта кај возачот, кој исто така бил уапсен.

Полицијата поради возење под дејство на алкохол уапсила и возачи во Штип (2,74 промили), Гевгелија (1,54 промили) и на регионалниот пат „Паљурци“ (1,52 промили).

По целосно документирање на случаите, против сите ќе бидат поднесени пријави по член 297-а од Кривичниот законик за безобѕирно управување со моторно возило, најавија од МВР.