Од оваа недела Општина Бутел започнува со организирање на приемен ден во секторот Урбанизам. Според најавите од оваа скопска општина, секој петок во периодот од 8 до 16 часот сите заинтересирани граѓани без закажување ќе можат да се консултираат со вработените во општинската администрација, за теми поврзани со урбанизмот и заеднички да се обидат да изнајдат решение.

– Од оваа недела секој петок ќе биде приемен ден без закажување во секторот за урбанизам. Граѓаните имаат за право на целосна достапност и можност да си ги решаваат своите потреби и проблеми. Општинската администрација мора да биде во служба на граѓаните и нивни сервис а не кочничар на процесите. Продолжуваме со отвореноста и достапноста кон граѓаните на Општина Бутел – истакна градоначалникот на Општина Бутел Дарко Костовски.