Жители на зграда на улицата „Балзакова“ во скопската населба Кисела Вода се жалат на невообичаен проблем – покрај традиционалната миризба на кромид, преку системот за вентилација во новата зграда, низ нивните станови секојдневно се шири интензивен мирис на чад од марихуана, пишува „4Њуз.мк“

Во последниот период, со доаѓањето на зимата и студот, проблемот се влошил, а станарите се жалат дека смрдеата речиси и да не престанува и дека им го прави животот неподнослив.

Тие велат дека изворот на проблемот е нивен комшија, кого не можат да го откријат. Тој, според нивните претпоставки, чади во својата кујна под аспиратор и миризбата потоа се шири во сите станови преку заедничкиот вентилациски канал.

„Не можеме да седиме во дневна или кујна. Мирисот е толку јак што имаме чувство дека некој пуши џоинт до нас. Влегува директно преку цевките од аспираторите и се шири низ становите. Ова е малтретирање“, коментираат станарите.

Неможноста да откријат кој од нивните комшии се дружи со психоактивната билка е единственото нешто што ги спречува станарите да пријават во полиција, додаваат тие.

„Не сакаме да бидеме кодоши, но ова веќе не се издржува. Ако не престане веднаш, немаме друг избор освен да повикаме полиција да изврши претрес таму каде што се сомневаме“, велат жителите на „Балзакова“.