Граѓаните гледааат како судството и обвинителството под контрола на Христијан Мицкоски го чистат Никола Груевски од одговорност за предметот „Талир 2“ и го одмрзнуваат криминалниот имот на ВМРО-ДПМНЕ, реагираат од СДСМ, откако Кривичниот суд денеска донесе ослободителна пресуда за поранешниот премиер Никола Груевски во предметот „Талир 2“, кој се однесуваше на обвиненија за пречекорување на службените овластувања и противправно финансирање на изградбата на седиштето на ВМРО-ДПМНЕ.

„По 8 години „Белата палата“, вредна 14 милиони евра и останатиот партиски имот во вредност од 2 милиони евра се повторно во рацете на ВМРО. Така изгледа кога криминална организација е на власт, таа се грижи само за себе и да ги спаси своите од одговорност. Правда нема! Груевски е осуден криминалец кој не ја издржува казната во Идризово. А Мицкоски не бара негова екстрадиција, не ги испраќа документите кои со месеции патуваа од една до друга институциија и никогаш не беа испратени. Намерно. Мицкоски му овозможува на својот ментор Никола Груевски да ја избегне правдата за Талир 2. Ова е свесна заштита на Никола Груевски, најголемиот симбол на криминалот и корупцијата во Македонија“, се наведува во соопштението на СДСМ.

Оттаму порачаа дека Фронтот за вистина и правда ќе се погрижи да одговара не само Груевски, туку и сите негови ученици и продолжувачи на неговото дело.

При образложението на денешната пресуда, судијката Даниела Алексовска истакна дека при одлучувањето биле земени предвид измените на Кривичниот законик од 2023 година, поради кои било изменето и обвинението.

Според Судот, и покрај измените на обвинението, доказите и утврдените факти останале непроменети, но обвинителството не успеало надвор од разумно сомневање да докаже дека Груевски го сторил делото пречекорување на службените овластувања.

Нов обвинител го презеде „Талир 2“ против Груевски и ВМРО-ДПМНЕ – најавува дека ќе го заврши случајот пред да застари