Наместо крилото Џејдон Санчо (20), во последните часови од преодниот рок Манчестер јунајтед го ангажираше уругвајскиот напаѓач Единсон Кавани (33), кој дојде без отштета, како и бразилскиот дефанзивец Алекс Телеш (27), кој пристигна од Порто за 15 милиони евра.

Клубот од „Олд Трафорд“ цело лето преговараше за доаѓањето на англискиот репрезентативец, но Борусија Дортмунд инсистираше на обесштетување од 120 милиони евра.

Но, висината на обесштетувањето не беше единствениот проблем, како што информираат британските медиуми, наведувајќи дека вкупните трошоци за ангажирање на Санчо би биле околу 250 милиони евра доколку се соберат износите за надомест, плата и провизија за менаџерот на овој играч.

На крајот, „црвените ѓаволи“ заклучија дека таков трошок би бил економски неоправдан кога клубот трпи голема загуба на приходите поради пандемијата на коронавирусот.

Имено, секој натпревар одигран на празен „Олд Трафорд“ го чини клубот околу пет милиони евра приход од билет.