Генералниот секретар на НАТО, Марк Руте, денеска од Подгорица порача дека Западен Балкан има големо стратешко значење за Алијансата и предупреди дека постојат актери кои се обидуваат да го дестабилизираат регионот, пренесе „Н1“.

На прес-конференција по средбата со црногорскиот премиер Милојко Спаиќ и членовите на Владата на Црна Гора, Руте изјави дека НАТО „нема да дозволи враќање на нестабилноста од минатото“.

„Знаеме дека постојат актери што се обидуваат да го повлечат Западен Балкан назад, да го нарушат напредокот и да го дестабилизираат регионот. НАТО е посветен на тоа проблемите од минатото да останат во минатото“, порача Руте, додавајќи дека Алијансата ќе се спротивстави на секоја злонамерна активност на нејзина територија.

Тој оцени дека светот се соочува со сериозни безбедносни предизвици, посочувајќи ја руската агресија врз Украина, сè поасертивната политика на Кина и нестабилноста во јужното соседство.

– На НАТО му се потребни силни општества кои градат силни војски – истакна Руте, повикувајќи ги сојузниците да инвестираат повеќе во одбраната, воената опрема и поддршката за Украина.

Генералниот секретар го поздрави придонесот на Црна Гора во меѓународните мисии, особено на Косово, како и поддршката за Украина и издвојувањата за одбрана кои надминуваат два проценти од БДП.

Премиерот Спаиќ изјави дека капацитетите на Војската на Црна Гора значително се зајакнати во последните години и дека довербата на граѓаните во армијата достигнала историски максимум од 78 проценти.

На средбата присуствуваа и потпретседателот на Владата, Алекса Бечиќ, министерот за надворешни работи Ервин Ибрахимовиќ и министерот за одбрана Драган Краповиќ. Црна Гора е членка на НАТО од јуни 2017 година.