Рускиот патријарх Кирил изјави дека Руската православна црква е подготвена за дијалог со Ватикан и со новоизбраниот папа Лав XIV за заштита на традиционалните вредности, воспоставување мир, заштита на христијанството, животната средина и хуманитарни прашања.

„И покрај разликите што постојат, односите со Римокатоличката црква се одржуваат. Лав XIV стана нов папа и ние, секако, сме подготвени за понатамошен развој на дијалогот со Ватикан“, рече рускиот патријарх, објави Риа новости.

На прием во руското Министерство за надворешни работи, патријархот Кирил нагласи дека Руската православна црква е подготвена да разговара со новиот поглавар на Римокатоличката црква за решавање на многу прашања што се на глобалната агенда денес.