Распоредувањето нуклеарно оружје во Финска ќе претставува закана за Русија и затоа Москва ќе преземе соодветни мерки како одговор, изјави денеска портпаролот на Кремљ, Дмитриј Песков, пренесе Ројтерс.

Коментирајќи ја најавата на финската Влада, Песков рече дека Финска со распоредување нуклеарно оружје на својата територија ѝ се заканува на Русија, објавија руските медиуми.

„Ако Финска ни се закани, ние ќе преземеме соодветни мерки“, изјави Песков.

Финска претходно соопшти дека планира да ја укине долгогодишната забрана за распоредување нуклеарно оружје на нејзина територија, придружувајќи им се на своите скандинавски соседи во потег што би можел да ја отвори вратата за распоредување атомски бомби на финско тло во време на војна.

Финскиот закон за нуклеарна енергија од 1987 година забранува увоз, производство, поседување и детонирање нуклеарни експлозивни направи на нејзина територија, клаузула за која некои Финци велат дека е корисна само за Русија доколку некогаш избувне војна. Земјата пред две години се приклучи на Северноатлантската алијанса како одговор на целосната инвазија од страна на нуклеарно вооружената Русија врз Украина.

„Промената е неопходна за да се овозможи воената одбрана на Финска како дел од алијансата и максимално да се искористат одвраќањето и колективната одбрана“, изјави финскиот министер за одбрана Анти Хаканен на прес-конференција.

Предложената промена ќе биде поднесена во парламентот, каде што десничарската коалициска влада има мнозинство.

Сојузниците од алијансата Франција и Германија во понеделникот објавија планови за продлабочување на соработката со европските партнери во нуклеарното одвраќање, што означува промена во политиката додека континентот се соочува со растечки закани од Русија и нестабилност поврзана со конфликтот со Иран.