Москва ќе ги почитува ограничувањата од последниот договор за контрола на нуклеарно оружје со САД, кој истече минатата недела, сè додека гледа дека Вашингтон го прави истото, изјави денес рускиот министер за надворешни работи Сергеј Лавров.

Договорот Нов СТАРТ истече на 5 февруари, не оставајќи никакви ограничувања за двата најголеми нуклеарни арсенали за прв пат по повеќе од половина век и поттикнувајќи стравувања од неограничена трка во нуклеарно вооружување, објави Ројтерс.

Рускиот претседател Владимир Путин минатата година изрази подготвеност да се држи до ограничувањата на договорот уште една година доколку Вашингтон го следи примерот, но американскиот претседател Доналд Трамп изјави дека сака Кина да биде дел од новиот договор, нешто што Пекинг го отфрли.

Во говорот пред Долниот дом на рускиот парламент денес, Лавров рече дека иако САД не одговориле на понудата на Путин, Русија ќе ги почитува ограничувањата на Нов СТАРТ сè додека гледа дека САД ги почитуваат.