Русија го повикала својот амбасадор во Ерменија на консултации во Москва, соопшти денеска руското Министерство за надворешни работи. Овој потег дојде еден ден откако претседателот Владимир Путин строго ја предупреди јужнокавкасата земја да не ги зајакнува врските со Европската Унија, објави „Москва Тајмс“.

„Рускиот амбасадор во Република Ерменија, С. Копиркин, е повикан во Москва на консултации во врска со чекорите преземени од ерменското раководство кон поблиски врски со Европската Унија, кои ја поткопуваат соработката во рамките на Евроазиската економска унија“, се вели во соопштението на министерството, осврнувајќи се на регионалната царинска унија предводена од Москва.

На самитот во Казахстан вчера, Путин ја предупреди Ерменија да не се стреми кон поблиски врски со ЕУ, споменувајќи „украинското сценарио“. Тој ја повика Ерменија да одржи референдум за својата економска иднина „што е можно поскоро“, нагласувајќи дека мора да избере помеѓу ЕУ и Евроазиската економска унија.

Тензиите меѓу традиционалните сојузници Русија и Ерменија се зголемуваат откако Азербејџан ја врати контролата врз отцепениот регион Нагорно-Карабах во 2023 година.

Ерменија ги обвини Русија и нејзините мировници дека не успеале да ја спречат воената офанзива на Баку и во 2024 година го замрзна своето учество во регионалниот безбедносен сојуз предводен од Москва. Путин претходно ја предупреди Ерменија дека поблиската европска интеграција носи исти ризици со кои се соочува и Украина, која беше нападната од Русија во февруари 2022 година.

Во текот на изминатиот месец, Русија ја ограничи продажбата или увозот на ерменски производи, цвеќе, минерална вода и алкохолни пијалоци, наведувајќи наводни прекршувања на прописите за здравје и безбедност.

Многумина ги гледаат ограничувањата како координирана кампања за притисок пред парламентарните избори во Ерменија следниот месец, на кои партијата „Граѓански договор“ на премиерот Никол Пашинјан се соочува со предизвик од низа проруски опозициски групи.