Македонскиот суперлигаш Охрид утре ќе го одигра реваншот од полуфиналето во ЕХФ Европскиот куп во кое има за цел пласман во финалето.

Ривал на охриѓани е словенечкиот состав Целје кој на првиот дуел на домашен терен славеше со минимална предност. Негативата од еден погодок е достижна, па во Охрид деновиве владее вистинска мобилизација во пресрет на мечот што може да значи голем успех за клубот.

Тренерот Борис Ројевиќ е свесен за тежината на предизвикот, но верува дека домашниот терен и поддршката од трибините ќе бидат значаен фактор.

„Можам да кажам дека не очекува тежок натпревар, против најталентираната екипа во Европа. Имаат четири-пет играчи со понуди од екипи што играат во Лигата на шампионите. Десното крило оди во Нант, средниот бек во Динамо, Анжиќ го бараат пет-шест екипи.

Сепак, сите наши момци едвај чекаат да истрчаат на терен и да ја почувствуваат енергијата од трибините. Охридската публика ќе покаже дека може подобро од тоа што нивните навивачи го правеа во Целје и тоа може да биде клучно за развојот на овој натпревар. Резултатски на првиот меч го спуштивме Целје на 27 гола што е речиси невозможно бидејќи цела сезона се над 30-35 гола. Ако го повториме тоа, сигурно ќе постигнеме повеќе голови и ќе се пласираме во финалето.

Кај нас не се сите играчи здрави, имаме проблеми. Не кажувам за кого се работи, но сите ќе стиснат заби. Заедно со публиката пишуваме историја и се надевам дека атмосферата ќе биде на нивото, а ние ќе се оддолжиме на теренот“, изјави Ројевиќ.

Натпреварот е закажан за утре со почеток од 19 часот, додека денеска ќе се дознае и првиот финалист, по реванш пресметката меѓу Татабања и Извиѓач, која стартува во 17 часот.