Рекордни 396 стрип-автори од целиот свет се пријавија на 22. Меѓународен салон за стрип „Велес 2025“. Од нив 164 се од нашата земја.

Сите пристигнати дела ќе бидат прегледани од жири-комисија составена од стрип и ликовни дејци од Велес, а дел од нив ќе бидат изложени на свеченото отворање на Меѓународниот стрип-салон во Велес, најзначајна стрип-манифестација кај нас, што ќе се одржи на 20 август во Велес.

Според Томе Трајков, програмски координатор на Стрип-центарот на Македонија (СЦМ), надминувањето на ланската рекордна бројка се должи на континуираната активност како во, така и надвор од нашата земја.

– Освен докажани стрип-мајстори многу радува откривањето на нови стрип-имиња од македонската стрип-сцена, кои заслужуваат поголема афирмација и внимание. Тоа е, секако, одраз и на соработката со училиштата ширум државата, вклучително и со ликовните педагози, но и со специјализираните едукативни студија. Скопје како метропола е солидно застапен, но деметрополизацијата во делувањето на СЦМ, исто така, ги дава своите резултати.

Што се однесува до меѓународните контакти, добра основа претставува и постојаната соработка со стрип-сцената од поранешните Ју-републики, но секако и комуникацијата со автори од Западен Балкан и од други континенти.

Со зголемувањето на вкупниот број пријавени стрипови на овој конкурс, секако треба и зголемена поддршка, во смисла на зголемен фонд на награди, присуство на наградените автори на свеченото отворање, составување на жири од меѓународни стрип-автори, и така натаму – потенцира Трајков.

Меѓународниот стрип-конкурс, како и Меѓународната стрип-колонија се два дела од Меѓународниот стрип-салон „Велес 2025“. Како засебни, но секако поврзани проекти, се поддржани од Министерството за култура и туризам на Македонија, како и од Општина Велес.