Реалните приноси на хрватските пензиски програми се шести највисоки во Европа. Кога ќе се пресмета просечниот принос од 2010 до 2022 година и од него ќе се одземе инфлацијата, тоа е принос од 2,9 проценти. Подобри од хрватските „пензионери“ се само оние во Шведска, Финска, Белгија, Романија и Холандија, а просекот на Европската Унија е 1,5 отсто. Во однос на успешноста, хрватските пензиски фондови се над просекот на ЕУ кога станува збор за номиналниот принос, кој во просек изнесуваше 5,1 отсто, анализира Јутарњи лист. Ова го покажуваат податоците објавени во прегледот на Ханфа за секторот на финансиски услуги во декември 2024 година. За задолжителните пензиски фондови (ОМФ), изминатите две години беа многу успешни – по рекордната 2023 година, 2024 година беше речиси исто толку добра.

Активата под нивно управување минатата година порасна за 3 милијарди евра или 14,8 отсто и достигна вредност од 23,2 милијарди евра. Вкупно се уплатени 16,4 милијарди евра (10,8 отсто повеќе), а исплатени се 2,7 милијарди евра (17,4 отсто повеќе од 2023 година). Во најризичната категорија А, која има најголемо учество на акции, просечниот принос изнесува 13,27 отсто со изразени варијации. Најнискиот принос на поединечен пензиски фонд лани изнесувал 7,62 отсто, а највисокиот е повеќе од двојно поголем (16,5 отсто). Приносот кај фондовите од категоријата Б, кој е со среден ризик, лани во просек изнесувал 9,68 отсто, при што опсегот на поединечни приноси се движи од 6,84 до 12,72 отсто. Во категоријата Ц, која е најконзервативна и најмалку ризична опција бидејќи доминантно се базира на обврзници, ланскиот принос беше на ниво од 3,55 отсто. Најуспешниот пензиски фонд од таа категорија лани ја зголемил својата актива за 4,33 отсто, додека најнискиот принос изнесувал 3,02 отсто.

Како општо правило, средствата од категоријата А најмногу им одговараат на најмладите осигуреници бидејќи тие се помалку чувствителни на ризик и на долг рок можат да постигнат повисоки приноси. Од друга страна, категоријата Ц е најдобра за осигурениците кои се блиску до пензионирање, а категоријата Б ги комбинира безбедноста и приносот. Ризикот на секоја категорија пензиски фондови е првенствено поврзан со структурата на средствата. Задолжителните пензиски фондови инвестираат речиси третина од средствата (31 отсто) во А категорија во акции, 40 отсто во обврзници и 17 отсто во инвестициски фондови.