Рамос сè уште е слободен играч, не успеаја преговорите со Бешикташ
Серхио Рамос (37) и натаму останува слободен играч и е во потрага по нов клуб. На легендарниот шпански репрезентативец му истече договорот со ПСЖ.
Искусниот дефанзивец сака да ја продолжи кариерата, се шпекулираше дека бил во преговори со турскиот Бешикташ, но тој трансфер нема да се случи.
Ова го потврдија од клубот на социјалните мрежи, а во тоа издание се наведува дека имало преговори со Рамос и Андерсон Талиско, бразилскиот играч за врска од Ал Наср. Преговорите со двајцата фудбалери прекинаа откако не успеаја да се договорат за финансиските детали.
Рамос е светски и двократен европски шампион со Шпанија, како и четирикратен освојувач на Лигата на шампионите со Реал Мадрид.
Се поврзуваше со можна преселба во Севиља, клубот во кој ја започна кариерата. И Севиља неодамна го демантираше доаѓањето на Рамос.