Машката ракометна репрезентација очекувано со победат ги заврши квалификациите за пласман на ЕП 2020 година. Во салата „Парк“ во Струмица, ракометарите со 27:23 ја совладаа Грција и го заверија првото место во групата 3 со кое обезбедија место во вториот барабан во ждрепката за групната фаза на ЕП кое ќе се игра во Австрија, Шведска и Норвешка.
Победата над јужниот сосед воедно претставува и одмазда за поразот од Кожани.

Избраниците на селекторот Данило Брестовац во грч го започнаа натпреварот, грешките беа почести и гостинските ракометари во првата половина успеаја да дојдат и до предност од три голови (3:6,5:8).

Сепак, по консолидацијата на играта на Македонија, работите почнаа да го добиваат посакуваниот идход и веќе од 26 минута благодарение на голот на Жарко Пешевски, „црвено-жолтите“ поведоа со 11:10. До полувремето, предноста беше зголемена за еден гол (13:11).

Во второто полувреме, со двата гола на отворањето, Македонија поведе со 15:11 и до крајот на наптреварот, рутински ја одржуваше предноста.
Кире Лазаров беше најпрецизен со постигнати шест голови, додека Филип Талески и Жарко Пешевски дадоа по еден помалку. На голот блескаше Никола Митревски со 11 одбрани. Кај Грција, Цирис даде шест голови, а на голот Буковинас имаше 14 одбранети шутеви.