Пред стартот на новата сезона во Првата македонска фудбалска лига, Работнички договори уште едно засилување за нападот на тимот, поранешниот младински репрезентативец Фахрудин Ѓурѓевиќ.

28-годишниот играч, кој доаѓа од редовите на чешки Храдец, потпиша едногодишен договор со „романтичарите“.

Претходно во својата кариера Ѓурѓевиќ има настапи и за Македонија ЃП и Вардар во нашето првенство, како и за Спартак Суботица во Србија, Градачац во БиХ и Варнсдорф во Чешка.

Од претходно е познато дека тренерот Ратко Достаниќ ќе остане уште две години на клупата, а ново име во стручниот штаб и Михаило Шејкероски – Шани.

потоа нови едногодишни договори потпишаа Драган Стојков и Христијан Пецов, на две години соработката ја продолжи Ристе Јанков, а уште 18 месеци верен ќе остане капитенот Горан Силјановски.

Како нови засилувања беа промовирани уште Муарем Муарем, Кристијан Стојковски и Фисник Зука, додека Давид Тошевски се пресели во редовите на рускиот клуб Ростов.

„Романтичарите“ веќе ја темпираат формата преку контролните натпревари, триумфираа против Пелистер (2:0), Охрид (2:1) и Борец (1:0), а загубија од Шкендија (0:2).

За шест дена почнува новиот шампионат, на 9 август Работничи во првото коло ќе игра на гостински терен против Македонија ЃП.