Прво монографско претставување на животот и делото на рускиот емигрант Сергеј Михајлов
Промоцијата на книгата „Сергеј Михајлов: живот и дело“ од проф. д-р Наташа Диденко од Институтот за национална историја ќе се одржи на 23 февруари 2024 година, во 12 часот, во Фоајето на НУ Национална опера и балет ‒ Скопје. Промотори на книгата се проф. д-р Билјана Ристовска-Јосифовска и акад. Драги Ѓоргиев.
Книгата на проф. д-р Наташа Диденко од Институтот за национална историја при Универзитетот „Св. Кирил и Методиј“ ‒ Скопје е прво монографско претставување на животот и делото на рускиот емигрант Сергеј Михајлов од неговото раѓање во родниот град Харков, Руска Империја во 1885 година, па сé до згаснувањето на животот во неговиот втор дом ‒ градот Штип во 1975 година.
Авторката на книгата ни ја открива неговата незапирлива творечка, уметничка, креативна, музичка и педагошка дејност кои ги стекнал низ широкиот опсег на неуморна работа и ангажираност низ животната практика.
Впрочем, тој во македонската културна историја и во колективната меморија на Штип и штипјани не е запаметен само како човекот кој го има поставено и премиерно изведено првото музичко-сценско дело ‒ операта „Палјачи“ од италијанскиот композитор Руџеро Леонкавало во 1925 година, туку и како човек кој преку примената на својот трансфер на знаења создал вредни музички дела, но и поттикнал и постигнал забележителни резултати во почетниот и институционалниот развој на музиката со поголема уметничка вредност во Штип.
Како „спиритус мувенс“ на музичката уметност во Штип, Сергеј Михајлов создал единствени доживувања и неповторлив успех со кои, како што има кажано рускиот актер, режисер и театролог Константин Сергеевич Станиславски, докажал дека „Уметноста е одраз и знаење за животот. Без да го познавате животот не можете да создавате“.