Пропадна огласот за избор на нов член на Антикорупциската комисија во Собранието. Според извори на Телма, причината е во тоа што Комисијата за избори и именување не е сигурна дали кандидатката Антонија Андонова Тасевска била или не била донаторка на политичката партија ВМРО-ДПМНЕ во 2017 година.

Нејзините лични податоци според телевизијата се совпаѓале со податоците на донаторската листа за ВМРО-ДПМНЕ во 2017 година, а запрашана на интервјуто во Собранието дали донирала, кандидатката Андонова Тасевска одговори дека не се сеќава дали дала 25 илјади денари за партијата предизборно.

Ваквиот одговор и сомнежи доведоа до тоа да се поништи целиот оглас. Претходно таа како услов за аплицирање на огласот, поднела нотарска изјава дека не е донаторка на политичка партија.

На огласот за нов член на Антикорупциска се пријавија 5 кандидати, но еден не се појави во Собранието па останаа четворица. Огласот беше распишан па поништен зашто поранешната антикорупционерка, Цвета Ристовска си поднесе оставка.