Трендот на враќање на винилите и на грамофоните како алатки за слушање музика го потврдува промоцијата на две нови винилни лонгплеј изданија.

Музичкиот издавач „Корпус деликти рекордс“ на 25 јануари во „Аудиокултура“ го промовираше винилното издание на албумот „Космика“ на Васко Серафимов.

Станува збор за прв негов албум објавен на винил и содржи десет нови нумери на кои учествуваат повеќе гости. Претходните албуми на Серафимов беа објавени на компакт-диск.

Во кафе-барот „Лонг плеј“ на 26 јануари беше промовирано винилното издание на албумот „Ебена антикултура“ на бендот „Рок агресори“.

Првично, албумот беше објавен пред 26 години на касета. Винилното издание содржи 15 песни од деби-изданието на касетата и бонус-лента направена за лонгплејката. Двете плочи се печатени во тираж од 200 примероци.

(Текстот е објавен во „Културен печат“ број 164, во печатеното издание на весникот „Слободен печат“ на 28-29 јануари 2023)