Проект „Тајните архиви на Скопје“: Домашните ленти на скопјани се полни со љубов
Третиот краток филм за „Старо Скопје“, насловен „Човек – Лав стори“, чиј автор е Катерина Габунија, премиерно ќе биде прикажан на 30 ноември, со почеток во 20 часот, во Кинотеката. Носител на проектот е НУФЦ „Вардар филм – Скопје“, поддржан е од Град Скопје, а реализиран во соработка со Кинотеката.
Проектот „Тајните архиви на Скопје: Човек – Лав стори“ е инициран, режиран и координиран од Катерина Габунија, а монтажата и дигитализацијата се на Александар Трајковски. Третиот дел од серијалот филмови за Скопје и скопјани со наслов „Човек – Лав стори“ претставува колаж од дигитализирани 8-милиметарски филмски ленти, чии протагонисти се граѓаните на Скопје. Во овој трет дел акцентот е ставен на љубовта.
„Таа ги спојува сите генерации и ги поврзува минатото и сегашноста. Љубовта е најсилната емоција што секогаш ја освојува публиката пред филмското платно, неа сме ја искусиле сите и најлесно ни е да се соживееме. Љубовта е наша движечка сила, која нѐ мотивира да твориме. Човекот не е совршен, знае и да згреши, но љубовта што ја дава, барем накратко (онаа таинствената), е најсилна и вистинска. Нефилмуваната љубов на скопјани е послатка и пореална од совршената“, посочено е во најавата на проекцијата.
Процесот на реализација на проектот, како и досега, почна со јавен повик до граѓаните за собирање на 8 мм и супер 8 мм ленти. Се продолжи со дигитализација и дигитална обработка на истите, а потоа се премина кон монтажа на слика и звук. На овој начин преку архивирање и дигитализација на стари филмски ленти од домашната архива на скопјани се открива скриеното богатство за животот во градот, но и се зачувуваат драгоцени документи, кои доколку не бидат дигитализирани ќе исчезнат или ќе бидат дегенерирани и неупотребливи.
(Текстот е објавен во „Културен печат“ број 107, во печатеното издание на весникот „Слободен печат“ на 27-28 ноември 2021)