Полицијата во изминатото деноноќие лишила од слобода 14 возачи на територија на државата поради безобѕирно управување возило, при што дел од нив биле под дејство на алкохол, а меѓу приведените има и малолетник без возачка дозвола.

Според МВР, петмина управувале возило без возачка дозвола, од кои едниот е малолетник, двајца возеле и покрај активна забрана, додека седуммина биле фатени како управуваат возило под дејство на алкохол.

Прекршоците се регистрирани во повеќе градови низ државата – Скопје, Велес, Демир Хисар, Охрид и Тетово, додека алкохолизирани возачи биле затекнати во Свети Николе, Кочани, Кавадарци, Струмица, Гевгелија и во Прилеп.

Во засилена акциска контрола на полицијата, во период од осум часа, синоќа биле санкционирани и возачи на мотоцикли, мопеди, трицикли и четирицикли.

Најмногу – 45 санкции – биле изречени за возење без заштитна кацига, додека 17 лица управувале велосипед со помошен мотор без возачка потврда.

Дополнително, четворица возачи биле санкционирани за несоодветна категорија, а три мотоцикли биле нерегистрирани.

За време на контролата, еден мотоциклист бил приведен поради безобѕирно управување со возило, согласно член 297-а од Кривичниот законик.

Од МВР најавуваат дека сообраќајните контроли ќе продолжат и во наредните денови.

Прегазен пешак во Кичево, казни за пијани возачи