Џозефин Мартл Корбин е родена во 1868-ма година во округот Линколн, со генетско пореметување наречено “дипигус”: имала две карлици, два пара нозе и два полови органи.

Кога се родила била малку потешка од просечно дете, а породувањето го закомпликувал и фактот дека била свртена на страна, па лекарите морале кратко да интервенираат. Како бебе била силна и буцкаста, растела со нормално темпо и напредувала. Единствената “мала” разлика која ја правела поразлична била фактот дека имала – четири нозе.

Нозете од надворешната страна и биле силни и нормални, со нив одела, додека внатрешниот пар бил како помала, потенка и пократка верзија на вистинските нозе. Докторите, не знаејќи уште за вистинска дијагноза, само претпоставувале.

Една од причините за деформацијата која ја навеле докторите е разликата од 10 години меѓу родителите. Таткото Вилијам, имено, имал 25 години, а мајката Ненси 15 години. Второ, докторите забележале дека родителите многу личеле еден со друг. Двајцата биле црвенокоси, со сини очи и многу светла кожа. Толку личеле што морале да нагласуваат дека не се роднини. Покрај Џозефин, имале уште седум “нормални” деца. Подоцна се воспоставило дека била родена со дијагноза со име дипигус. Резултат на тоа било дека е родена и со две карлици, една до друга. Со секоја имала и сет нозе. Според медицинското досие и дневниците кои ги пишувал нејзиниот доктор, таа можела да оди и со внатрешните нозе, иако не биле доволно силни да го прави тоа, што и било неважно со оглед на тоа дека не биле доволно долги да ја допрат земјата.

Во 1882-ра година, кога имала 13 години, почнала да настапува со името “Четириножното девојче од Тексас”. Тоа се случило откако на љубопитните соседи почнала да им наплаќа да ги гледаат нејзините нозе, па на нејзиниот татко му текнало дека тоа е идеален начин да се заработи. Станала неверојатно популарна, и многу брзо почнала да оди на мини-турнеи. Посетувала мали градови и местенца каде што настапувала за публика. Заработувала околу 450 долари. Потоа во приказната се вмешал познатиот бизнисмен, филантроп и политичар П.Т Барнум, кој ја вброил во неговата флота од чудни и необични луѓе. Четири години работела за Барнум, и дури инспирирала и други циркуси на девојчиња да им ставаат лажни нозе, бидејќи, поради договорите, не можеле да дојдат до неа.

Со само 18 години се повлекла од бизнисот. Запознала доктор и се заљубила. На 19, веќе била во брак. Една година подоцна, во 1887-ма, открила дека е бремена. Прво за жалела на болки, температура, главоболка и недостиг на апетит. И покрај единствената аномалија, докторите биле уверени дека може да ја издржи бременоста. Во првиот обид работите тргнале на лошо, и по првото тромесечје морала да абортира, бидејќи тешко се разболела. И покрај тоа, подоцна родила уште четири сосема здрави деца. Нејзиниот живот бил релативно нормален, иако често била споменувала во медицинска литература. Таа тивко и повлечено живеела во својот дом во Тексас.

Починала во 1928-ма година, по воспаление на кожата. Иако тоа денес без проблем би било решено со антибиотици, тогаш била сериозна дијагноза.

Била погребана на 6 мај 1928 година, а нејзиното гробно место е прекриено со цемент.

Членовите на семејството стоеле над гробот во смени додека цементот не се исушил целосно. Тоа било за да никому не му падне на памет да го ексхумира нејзиното тело, особено со оглед на тоа дека многу лекари нуделе големи пари за телото на „четириножното девојче од Тексас“.