Во чест и сеќавање на заменик-градоначалникот на Град Скопје Енвер Малиќи денеска со едноминутно молчење почна и се одржа онлајн комеморативна седница. На комеморацијата од починатиот заменик-градоначалник се простија членовите на неговото семејство, пријателите и соработниците.

Градоначалникот на Град Скопје Петре Шилегов на комеморацијата истакна дека со неговото заминување изгубивме голем и искрен пријател, но и соработник кој, како што рече, несебично го делеше своето обемно искуство во повеќе области.

– Бидејќи беше човек со ведар дух, со него лесно се разговараше за сите теми, па така често разменувавме мислења за развојот на локалната самоуправа, за економијата, како и за политички теми поврзани со земјава и регионов. Тие што го познаваа Енвер, знаат дека тој од ништо не се плашеше и секогаш беше подготвен за нови предизвици. Енвер беше еден од највлијателните стопанственици во државата и затоа беше почитуван во бизнис заедницата како успешен бизнисмен, но како голем хуманист и филантроп. Нема зборови кои можат да ја ублажат болката на семејството коешто доживеа ненадоместлива загуба, но изгубивме и сите ние коишто го познававме Енвер. Тој беше човек со големо срце и со разбирање за проблемите и потребите на своите сограѓани. Нека ти е светол патот мој пријателе и почивај во мир, рече Шилегов.

Во име на советниците на Советот на Град Скопје сочувство до семејството Малиќи изрази Бесник Ајети, од ДУИ.

– Дозволете во мое име и во име на колегите да ви изразам длабоко сочувство по повод заминувањето од овој свет на најскромниот колега, бизнисмен и човек што некогаш сум го познавал, покојниот г. Енвер Малиќи. Несомнено, господин Енвер беше посебен по својата професија и пошироко. На овој почесен ден, духовно и во молитва сме заедно со семејството Малиќи. Нека е вечен споменот за него, рече советникот Ајети.

Во просториите на Град Скопје (пред влезот во Кабинетот на градоначалникот, барака број 4) денеска е отворена книга на жалост за прерано починатиот заменик-градоначалник Енвер Малиќи. Сите граѓани коишто сакаат да се запишат во книгата на жалост ќе можат да го направат тоа од 11 до 16:30 часот, до петок.

Заменик градоначалникот на Скопје, Енвер Малиќи почина вчера наутро од компликации со коронавирусот во „Систина“ откако претходно бил лекуван десет дена на Клиниката за инфективни болести и фебрилни состојби во Скопје, потврдија за „Слободен печат“ од болницата.

Почина Енвер Малиќи од компликации со ковид-19