Во Младинскиот културен центар (МКЦ), во Денсинг салата, на 16 јуни, во 20 часот, ќе се одигра претставата „УПМ“ (Уметност – Политика – Мудрост), во организација на танцовото здружение „Икс на квадрат“.

Претставата е во кореографија и режија на Јована Зајкова и Бобан Русески. Дел од музиката е на Дејан Теодосиевски, во изведба на квартетот „Вива стрингс“, а дел е сплет на вокал и перкусии во изведба на музичарката Зарина Првасевда.

На сцената ќе настапат Бобан Русески, Јована Зајкова и Сара Цветковска, како и Викторија Коцева, Клара Христовска и Микаела Анџела Глигорова (студенти на Универзитетот „Гоце Делчев“, катедра за современ танц), Илина Костовска и Моника Шолевска (ученици од ДМБУЦ „Илија Николовски Луј“, оддел за модерен танц), и Марко Младеновиќ и Наум Ѓоргиески (студенти на Факултетот за драмски уметности).

„Секој викенд истото прашање… Да одам на театар или во кафана? Изборот е тежок, џебовите не толку многу, карта за претстава 300 ден, а грло жедно без пијачка не поминува. Епа другари и нас ни се смачи. Додека да завршиме со работа сите кафани испозатвориле. Па си викаме две у едно. И работа и задоволство. Ќе си ја земеме работата у кафана. Или во случајов кафаната на работа. Па ако сакате да се пофалите дека сте биле на театар, а всушност да се закитите со едно културолошко кафанско искуство, елајте на претстава. Ќе има мезе, пијачки, добро друштво. И жива музика ќе има. А и ние ќе настапиме исто…“, стои во најавата на претставата.

Претставата е поддржана од Министерството за култура на Република Северна Македонија.