Преносот на Оскарите од 2029 година повеќе нема да се емитува на телевизијата Еј-би-си“(ABC), туку ќе се пренесува директно на Јутјуб, откако Академијата за филмска уметност и наука склучи ексклузивен повеќегодишен договор со видео-стриминг платформата на Гугл.

Како што пренесува „Си-ен-ен“, договорот меѓу Академијата за филмска уметност и наука и Јутјуб ќе започне со 101. церемонија на доделување на Оскарите во 2029 година и ќе трае до 2033 година.

„Возбудени сме што склучуваме повеќегодишно глобално партнерство со Јутјуб, кој ќе стане идниот дом на Оскарите и на нашата целогодишна програма на Академијата“, изјавија извршниот директор на Академијата, Бил Крамер, и претседателката на Академијата, Линет Хауел Тејлор, во заедничка изјава.

Како што наведуваат, Академијата е меѓународна организација, а ова партнерство ќе ѝ овозможи да го прошири пристапот до својата работа до најголемата можна светска публика, што ќе биде од корист и за членовите на Академијата и за филмската заедница.

Телевизискиот пренос се емитуваше во живо на „Еј-би-си“ уште од 70-тите години, меѓутоа рејтинзите на Оскарите генерално опаѓаа од врвот во 1998 година, кога филмот „Титаник“ освои 11 статуетки и привлече околу 55 милиони гледачи.

Најновиот телевизиски пренос привлече речиси 20 милиони гледачи, што претставува мало подобрување во однос на периодот за време на пандемијата со ковид, но и понатаму е далеку од публиката што ја следеше церемонијата во времето на нејзината најголема комерцијална и културна моќ.

„Оскарите се една од нашите клучни културни институции, кои ја слават извонредноста во раскажувањето приказни и уметноста. Партнерството со Академијата за да ја донесеме оваа прослава на уметноста и забавата до гледачите ширум светот ќе инспирира нова генерација креативци и љубители на филмот, а истовремено ќе остане верно на наследството на Оскарите“, изјави извршниот директор на Јутјуб, Нил Мохан.

Церемонијата, вклучувајќи го и преносот од црвениот тепих и сцените „зад кулисите“, ќе биде достапна во живо и бесплатно за гледачите ширум светот, како и за претплатниците на Јутјуб во Соединетите Американски Држави, соопшти Академијата.

„Еј-би-си“ која беше „горд дом на Оскарите повеќе од половина век“, во соопштение наведе:

„Со нетрпение ги очекуваме следните три преноси, вклучувајќи ја и стогодишнината на церемонијата во 2028 година, и ѝ посакуваме континуиран успех на Академијата за филмска уметност и наука.“