Премиерата на документарниот филм „Време на бетон“ ќе се одржи во киното „Фросина“
Документарниот филм „Време на бетон“ ја раскажува приказната за Скопје, поточно неговата архитектонско-урбанистичка историја. Особен фокус е ставен на модерната, која го следи градот од почетокот на дваесеттиот век. Посебно е фокусирана кусата ера на брутализмот, кога градот ја доживеа својата архитектонска и урбана ренесанса.
– Што е она што доведе до овој подем во време кога е тоа најпрогресивен правец во светската архитектура? Која е неговата вредност, естетска, архитектонска, практична и зошто тој со децении е предмет на политичка конфронтација, идентификација и антагонизам? „Време на бетон“ претставува обид да ги деконструира и објасни овие феномени – посочуваат од филмската продукција „Скопје филм студио“.
Филмот „Време на бетон“ е снимен по сценарио на Игор Иванов и Томи Салковски. Автор на нарацијата која го води филмот е Ѕвездан Георгиевски, а наратор е Никола Ристановски. Соработници на сценариото се Мишко Ралев и Јордан Минов, изборот и изведбата на музиката е на пијанистката Дуња Иванова.
Режијата е на Игор Иванов, кинематографер е Ѓорѓи Клинчаров, монтажата е на Дејан Смилески, а дизајнот на звук на Игор Поповски. Продуцент е Томи Салковски.
Премиерата на документарниот филм „Време на бетон“ ќе се одржи на 18 април, во 20 часот, во киното „Фросина“ при МКЦ во Скопје. Филмот е направен со поддршка од Агенцијата за филм на Република Северна Македонија.