Морето во Истра е преполно со медузи, поради што експертите упатуваат апел до капачите да бидат особено внимателни. Како што пренесуваат хрватските медиуми, во последните денови капачите на западниот брег на Истра се соочуваат со непријатно изненадување, бидејќи морето е преполно со т.н. компас медузи, пренесува „Еуроњуз“.

Станува збор за вид познат по долгите пипала и нематоцисти (отровни клетки) кои можат да предизвикаат болни изгореници, црвенило и оток на кожата.

Експертите како главна причина за нивното зголемено присуство ја наведуваат невообичаено високата температура на морето. Според најавите, се очекува нивниот број да се намали во следните две недели.

Покрај медузите, во морето се појавиле и поголеми јата на реброчи, инвазивен вид кој преку баластните води пристигнал во Јадранското Море и таму нашол идеални услови за живот и размножување.

Иако не се опасни за луѓето, тие го заматуваат морскиот екосистем.

Станува збор за желатинозни, проѕирни организми кои по изглед многу личат на медузи, но нивното тело е двобочно симетрично и немаат нематоцисти.

Експертите нагласуваат дека нема простор за паника, но кога станува збор за компас медузата, потребна е зголемена внимателност.