Новогодишната магија за пејачот Димитар Андоновски не се мери со светилки и гламур, туку со спокојот во душата, искреноста кон себе и топлината на семејството. Зад него е година на важни лични и уметнички одлуки, година во која, како што вели, конечно се слушнал себеси и без компромиси ѝ се посветил на музиката што ја чувствува.

Во празнично расположение за „Слободен печат“, Димитар зборува за традициите од детството, најголемите лекции од 2025 година, инспирацијата што го води, желбите за 2026 и како ќе ја пречека Новата година.

На која традиција од детството секогаш се сеќаваш кога ќе почне новогодишната магија?

– Најмногу се потсетувам на Божиќ и на Бадник – шетањето со пештерата низ маалото и пеењето коледарски песни. Тоа беа моменти исполнети со чиста радост и искрена детска среќа. Секако, тука е и новогодишната магија што започнуваше уште околу Св. Никола, со украсувањето на елката и чувството дека доаѓа нешто убаво. Најсилен впечаток ми останала таа топла, семејна енергија – кога сите сме дома заедно, насмеани и празнично расположени.

Која е најважната лекција што ја научи во 2025 година?

– Дека мирот со себе е најголем успех. Научив дека не мораш на сè да одговараш, ниту секој да го убедуваш во твојата вистина. Кога си чесен со себе и со тоа што го создаваш, работите сами си го наоѓаат патот.

Кој момент од годината би го издвоил како најголем успех или пресвртница и зошто?

– Моментот кога одлучив да бидам целосно искрен и посветен во мојата музика и во проектите на кои работев оваа година, без компромиси. Таа одлука ми донесе нова енергија и нова слобода – и како автор, и како човек. Понекогаш најголемиот успех е кога конечно ќе се слушнеш себеси.

Што би сакал да оставиш зад себе во 2025, а што дефинитивно го носиш со себе во 2026 година?

– Ги оставам сомнежите и луѓето што не веруваа во мене, а со себе ги носам дисциплината, трпението и љубовта кон создавањето. Тие три работи ми се најсилниот капитал.

Што те инспирираше најмногу годинава?

– Искрените луѓе, вистинските приказни и многу преслушана нова музика што постојано ми отвораше нови креативни видици. Преку различни звуци, жанрови и идеи, инспирацијата природно се претвораше во авторски израз. Но мојата најголема и константна инспирација е семејството, мојата сопруга и моите синови. Тие не ме инспирираат само за музика, туку за сè во животот и ми се најсилната мотивација да бидам подобар човек и уметник.

Која желба за 2026 година ќе ја спакуваш под елка и би сакал да биде твојот новогодишен подарок?

– Здравје и мир, тоа се темелите за сè. Би сакал луѓето повеќе да се обединат, да се сакаат и да се почитуваат меѓусебно. А на уметнички план, сакам 2026 да биде година на македонската песна, година на длабоки песни, вистински сцени и публика што слуша со срце.

И за крај, дали со твоето семејство го украси домот и каде ќе ја дочекаш Новата година?

– Да, домот е веќе накитен со мера и вкус. Новата година ќе ја дочекам работно како и секоја година. Одморот ќе дојде веднаш по празниците.