До 2021 година, Венди Вилијамс (61) беше една од најуспешните водителки на американските дневни ток-шоуа. Заработуваше повеќе од 50 илјади долари по емисија, односно околу 10 милиони годишно. Во своето шоу „Шоуто на Венди Вилијамс“, кое започна во 2008 година и се емитуваше во 52 земји, имаше многу трачеви, контроверзии поради кои водителката се извинуваше, расправии со гости и бројни откритија – убави, грди и скандалозни.

На врвот на својата кариера, проценките покажуваа дека Вилијамс, која ја започнала како пофалена радио-водителка и диџејка, имала повеќе од 20 милиони долари лично богатство. Дополнително заработуваше преку своите други бизниси – модна линија и накит, перики, продукција на реалити емисии, реклами и книги.

Дел од богатството изгубила во разводот со Кевин Хантер, кој бил финализиран во 2020 година. Тој заминал со значителен износ од продажбата на нивниот заеднички дом, удел во компанијата „Продукција на Венди Вилијамс“, како и со отпремнина и алиментација.

И по тоа, Вилијамс изгледаше незапирлива. Но, во 2021 година отиде на боледување поради проблеми со тироидната жлезда и Гравесова болест, која ѝ била дијагностицирана три години претходно. Неочекувано, шоуто „Шоуто на Венди Вилијамс“ беше укинато во јануари 2022 година.

Комбинацијата од финансиски загуби, губење на работата и нарушеното здравје довела до тоа банката „Велс Фарго“ да ѝ ги замрзне сметките и да побара од судот привремено финансиско старателство над неа. Тврдеа дека Вилијамс е „жртва на негативно влијание и финансиска злоупотреба“ и дека не е способна самостојно да управува со своите финансии.

По краток ангажман на поранешниот менаџер Берни Јанг како старател, кој наводно ја измамил и зел пари од нејзината сметка, судот назначил адвокатка специјализирана за старателства, Сабрина Мориси, како официјална старателка во април 2022 година. Тоа следело по низа здравствени проблеми кај Вилијамс, предизвикани од Грејвсовата болест, лимфедем и алкохолизам.

Во февруари минатата година, непосредно пред премиерата на контроверзната документарна серија „Каде е Венди Вилијамс?“, која нејзината старателка се обидувала да ја забрани, лекарите потврдиле дека водителката боледува од деменција. Било откриено дека уште во 2023 година ѝ била поставена дијагноза на афазија и фронтотемпорална деменција (ФТД), кои веќе тогаш предизвикувале сериозни проблеми во нејзиниот живот.

Поранешната телевизиска ѕвезда веќе подолго време живее во установа за стари лица – „Котери Сениор Ливинг“ во Хадсон Јардс, Њујорк. Тоа е луксузен дом за повозрасни лица, кој нуди медицинска и персонална грижа, но и велнес, како и богат општествен и културен живот. Во зградата има приватно кино, ресторан, бар, спа и фризерски салон. Сепак, Венди го доживува тоа место како затвор – „златен кафез“, како што самата го нарекла.

Во разговор за списанието „Кат“, Вилијамс дала редок увид во својот живот во установата. Новинарката го опишала предворјето како луксузен простор украсен со свежи лилјани, мермерен под и голем кристален лустер во форма на водопад. Објектот има 24-часовна медицинска грижа и бројни погодности.

Вилијамс разговарала со новинарката по телефон од својата соба на одделот за лица со деменција. Според описот во репортажата, катот е заклучен, а Вилијамс мора да добие дозвола и од установата и од старателката ако сака да излезе. Не ѝ е дозволено да има мобилен телефон, но има фиксен од кој може само да упатува излезни повици.

Нејзиниот пријател и сопственик на луксузниот ресторан „Тучи“ во Њујорк, Макс Тучи, рекол дека Венди го опишува домот како „дупка“.

„Тоа е место каде милијардери ги праќаат своите баби. Но, знаете, на неа тоа не ѝ треба. Венди не лаже,“ изјавил тој.

За време на телефонскиот разговор, Венди ја прашала новинарката: „Ги видовте ли тие луѓе? Тие старци? Зошто би сакала да го гледам тоа? Ова е ужасна ситуација. Не можам да ви кажам колку пати сум барала да ме преместат од овој кат“.

Последен пат била видена во јавност во септември, за време на Њујоршката недела на модата. Иако нејзините појавувања во јавност се ретки, таа нагласила: „Знаете дека сум била надвор. Значи, очигледно излегувам.“

Додала дека редовно оди во голема црква во Бруклин.

„Тоа ми дава вера и ми помага да останам поврзана со Бог и со самата себе“, вели таа.

Раскажала дека претходно била сместена на третиот кат, во просторија со големи прозорци и поглед кон 35-та улица. Бањите биле целосно покриени со мермер, а собите имале подно греење и помошни елементи за движење.

Американските медиуми објавија дека на својот роденден во јули, Вилијамс излегла во ресторан во рамките на домот и се опила. Наскоро потоа била преместена на одделот за лица со деменција.

Рекла дека судијата ѝ дозволил да има таблет уред во нејзината нова соба – гарсониера од 33 квадратни метри, за која плаќа 25.800 долари месечно (околу 22.200 евра). На уредот ги слуша своите стари радио-емисии и ги следи вестите за себе.

„Кат“ го опиша одделот за деменција како мрачен и стерилен. На вратите нема брави, ниту во апартманите има шпорети или фрижидери, од безбедносни причини. На катот има вежбална, каде што новинарката ја затекнала Вилијамс како вежба на лента за трчање, облечена во црна маица, хеланки и својата препознатлива руса перика.

„Изгледаше добро,“ напишала авторката.

Освен што плаќа за сместувањето, од нејзините сметки се покриваат и трошоците за старателката Мориси, во износ од 10 илјади долари месечно. Таа минатата година го продала нејзиниот стан од 223 квадрати, наводно со загуба, и ги згрижила двете нејзини мачки. Кога не успеала да го спречи прикажувањето на документарецот „Каде е Венди Вилијамс?“ со образложение дека продуцентите ја искористиле ранливата ѕвезда, се обидела барем да ѝ обезбеди поголем хонорар, но и тоа без успех.

Во јуни повторно се појавил нејзиниот поранешен сопруг Кевин Хантер, кој во нејзино име поднел тужба тврдејќи дека Венди не треба да има старател и дека судијата е „корумпиран“. Хантер го нарекол старателството „лажно ропство“ и побарал смена на Мориси, иако таа важи за врвен правник. Во анализите на судските документи се наведува дека Хантер со години примал 37.500 долари месечно алиментација, но изворот пресушил откако старателството стапило во сила, па неговите мотиви за тужбата се доведуваат во прашање. Тој барал 250 милиони долари оштета која би била поделена меѓу него и Вилијамс. Судот неодамна ја одбил таа тужба, но сè уште постои можност за жалба.

Новинарите разговарале и со нејзиниот син, Кевин Хантер Џуниор, кој кусо изјавил: „Не сакам премногу да се мешам. Се обидувам да го изградам својот пат, далеку од сето тоа. Само сакам мајка ми да се извлече од ова, затоа што тоа не е исправно“.

Некои американски медиуми пишуваат дека во наредните недели или месеци може да биде објавен нов лекарски извештај за здравствената состојба на Венди Вилијамс. Судот кој го води случајот може да потврди старателството, да ги ублажи ограничувањата, да ја замени Мориси или целосно да го укине старателството. Сепак, неименувани извори сметаат дека укинувањето е малку веројатно.