Пратеничката од редовите на СДСМ Славјанка Петровска преку Фејсбук соопшти дека е позитивна на коронавирус.

„Денес попладнево ненадејно добив покачена температура и омалаксаност додека бев на седница на Собрание. Попладнево се тестирав и за жал резултатот е позитивен. Изминативе денови имав ограничени движење и физичко присуство на состаноци, каде постојано носев заштитна маска.
Ги почитував правилата, но очигледно е дека имало момент на невнимание. Ве замолувам бидете внимателни, болниците се преполни, лекарите изморени, а ние сме лесни ранливи. Чувајте се“, напиша таа попладнево.

Во Собранието во тек е расправата за измените и дополнувањата на Законот за заштита на населението од заразни болести.

Претходно, измените и дополнувањата на Законот доцна попладнево поминаа на собраниската Комисија за здравство.

По информацијата дека Петровска е заболена од ковид-19, веројатно ќе бидат преземено следење на нејзините контакти во Собранието, за да се открие евентуалното ширење на коронавирусот меѓу пратениците.

Пред два дена и министерот за внатрешни работи Оливер Спасовски објави дека е позитивен на коронавирус.