Повеќе од 20 години од нашите животи поминуваме пред екраните: Eгзит и УНИЦЕФ работат на подобрување на менталното здравје на младите
На денот на раѓањето на фестивалот, 29 јуни, Фондацијата Егзит и УНИЦЕФ започнуваат повеќегодишна и сеопфатна соработка чија цел е да се подигне свеста за важноста од грижата за менталното здравје на младите, пишува српскиот „Јуроњуз“.
Ова е една од најважните теми денес бидејќи нарушеното ментално здравје е водечка причина за болести, попреченост и социјална исклученост, додека вистинскиот разговор, блискост и поврзаност се едни од клучните ресурси за неговата стабилност.
Затоа Егзит и УНИЦЕФ со оваа кампања се обидуваат да укажат на огромното значење на контактите во живо за менталното здравје, особено во дигиталната ера кај младите. Првата фаза од кампањата, насловена „Животот е во живо“, е фокусирана на дигиталната зависност и привлекувањето на итно внимание на застрашувачките размери што ги достигна.
Иако технологијата нѝ ги прави секојдневието и комуникацијата исклучително лесни, линијата помеѓу нејзината корисна и опасна употреба е сè потенка и потенка.
Се проценува дека милијарди луѓе ширум светот страдаат од дигитална зависност и дека таа е поприсутна од сите други форми на зависност заедно. Во моментов во светот се користат околу 6,8 милијарди мобилни телефони, а податоците покажуваат дека над 65 отсто од светското население покажува знаци на номофобија, т.е. зависност од овие уреди!
Моменталната проценка за просечното време поминато пред мобилните, компјутерските и ТВ екраните е над неверојатни 20 години живот, додека просечниот корисник на мобилен телефон го допира овој уред 2.617 пати на ден!
Статистиката вели дека вообичаениот возрасен човек поминува околу осум часа и 45 минути дневно пред екран и дека повеќе од половина од сопствениците на мобилни телефони никогаш не го исклучуваат телефонот – 24 часа на ден, седум дена во неделата, 365 дена во годината.
„Сторито ќе истече, а вистинска приказна трае цел живот“ е слоганот на првата фаза од кампањата, чија цел е да ги истакне сите оние незаменливи моменти кои ги поминуваме со блиски луѓе и сами, а кои го сочинуваат животот автентичен и реален, а може да се доживеат само во живо.
Од друга страна, прекумерното време поминато пред екраните, на социјалните мрежи, како и во светот на видео игрите, е поврзано со бројни ментални тешкотии и нарушувања, додека дигиталниот идентитет и дигиталниот свет стануваат поважни од реалниот живот, особено кај младите.
„Колку што сознанието за распространетоста на дигиталната зависност изгледа застрашувачко, тоа е и можност за увид и свесност. На нашите настани масовно гледаме телефони во воздухот, но гледаме и дружење, запознавање, прегратки, автентичност, блискост, допир, контакт во живо. Затоа веруваме дека тоа е можно и неопходно е да се создаде рамнотежа, а чекор пред тоа е да бидеме свесни за ситуацијата во која се наоѓаме“, велат од фондацијата Eгзит.