Потврдено академско портфолио на македонскиот композитор Јане Коџабашија
Македонскиот композитор и истакнат научен деец, долгогодишен член на Сојузот на композиторите на Македонија и актуелен претседател на Собранието на СОКОМ, проф. д-р Јане Коџабашија, е избран за член на Дукљанската академија на науките и уметностите во Црна Гора.
Изборот за академик на проф. д-р Јане Коџабашија во оваа институција е признание и резултат на неговата повеќедецениска дејност, со која дава значаен придонес во развојот на македонската музичка култура и на нашата научна мисла.
Проф. д-р Коџабашија во текот на своето дејствување остварува значајни резултати во некои од базичните текови во развојот на македонската музичка култура – во музичката продуктива, во текот на работниот век во Македонската радиотелевизија, како одговорен уредник на Музичката и касетна продукција, директор на Македонија концерт, музичката публицистика и обемните научни истражувања во областа на музичкото културно наследство, за значаен број црковно-музички дејци, ракописни и печатени црковно-музички зборници и откривање на досега недостапни музички ракописи од областа на црковното пеење од византиската традиција кај нас. Овие истражувања во неговата дејност започнати во текот на 80-тите години на минатиот век, па сѐ до денешни дни претставуваат значаен придонес и остварена богата активност во областа на теоријата и практиката на црковното пеење од византиската традиција.
Издадените седумнаесет теоретски и монографски изданија и зборници на црковно пеење настанати на територијата на Македонија во 19-тиот и почетокот на 20-тиот век, се монографски изданија на оригинални ракописи од македонски музички дејци, со воведен текст и транскрипција од невматска на европска нотација, како и педагошка литература, прва од ваков вид на македонски јазик за изучување на теоријата и практиката на источното црковно пеење.
Неговите трудови се изобилно цитирани од истражувачите на културното музичко наследство во земјава и во странство и се употребуваат како педагошка литература за изучување на теоријата и практиката на источното црковно пеење и во образовни институции надвор од нашата земја, известија од СОКОМ.
(Текстот е објавен во „Културен печат“ број 115, во печатеното издание на весникот „Слободен печат“ на 5-6 февруари 2022)