Амбасадата на Шпанија во Скопје и галеријата „Акантус“ го организираат настанот „Кафе трансверзал 8“ (Café Transversal VIII), разговор со шпанскиот уметник Хавиер Каро Тембури, кој ќе се одржи на 9 јули 2026 година (четврток), со почеток во 18 часот, во „Јуроп хаус Скопје“.

На настанот, покрај Хавиер Каро Тембури, ќе учествуваат и уметницата Дијана Томиќ Радевска, кураторката Бојана Јанева, додека модератор на разговорот ќе биде Бојан Д. Георгиевски. Дискусијата ќе биде посветена на современите уметнички практики, креативните процеси и значењето на културната размена.

Хавиер Карро Тембури (Мадрид, 1997 год.) е шпански скулптор, образован на Факултетот за убави уметности во Париз (Beax-arts de Paris) и Универзитетот за убави уметности во Хамбург (Hochschule für bildende Künste). Тој живее помеѓу Париз и Мадрид додека работи и изложува меѓународно, редовно претставувајќи се во Париз, Виена и Мексико Сити, а сега и во Скопје.

На 7 јули, во дворот на Железничката зграда во Скопје, тој го одржа перформансот „Кафе трансверзал 8“, кој беше прв од трите настани кои се планирани за време на резиденцијата на уметникот во Скопје, а воедно е дел од низа на изложби под насловот „Café Transversal“ низ коишто уметникот ги разгледува разликите и сличностите на традициите на пиење кафе низ различните континенти, држави и региони.