Нововостановената манифестација „Преспански треперења“ свечено беше промовирана на 5 јули во дворот на црквата „Св. Наум Охридски“ во селото Болно – ресенско и беше посетена од афирмирани поети и поетеси од различни градови од земјава.

Програмата ја збогатија ресенските изведувачи Мартин Стерјовски и Григориј Прцуловски, а водителка беше Наташа Зузаровска. Уметнички придонес даде и уметникот Таше Соколевски. Настанот заврши со манастирски ручек за кој се погрижи младата домаќинка Елена Мицалевска, зад која стои успешен тим. За озвучувањето се погрижи Нико Милошевски.

„Преспански треперења Ресен“ – Ресен е основано како здружение за литература и култура. Претседател на здружението е Маријана Митревска, позната и активна писателка од Ресен.

– Мисијата на здружението е со посебен акцент на поезијата. Но, исто така, ќе обезбедува услови за богат, квалитетен и разновиден културен живот. Здружението ќе го чува духовното наследство и неговиот културен идентитет. Ќе афирмира етничка разновидност и разноличност во културата. Ќе поттикнува творештво на млади од сите сфери на културата. Ќе промовира проекти и програми кои се во тек со светскиот и европскиот културен тренд. Планирано е да обезбедува континуирани културно-уметнички манифестации кои се од локален и меѓународен карактер. Ќе има активности во функција на туризмот и промовирање на градот Ресен и РС Македонија, а ќе поттикнува и меѓународни соработки.

Во ликовната дејност здружението ќе промовира групни и поединечни ликовни изложби. Може да организира музички настани, концерти на групи и солисти со оригинална современа музика и фестивали. Може да промовира и филмови, да организира литературни промоции, новогодишни, спортски, хуманитарни настани, квизови, цртање во природа или други локации во Општина Ресен и пошироко. Може да учествува и да организира разни манифестации во областа литературата за сите возрасти. Може да има дејност и во областа на екологијата – истакнува Митревска.

Плановите на здружението во иднина се да продолжи со поетски читања, печатење збирки и промоција на убавините на Преспа и на Македонија.