Министерството за внатрешни работи (МВР) информира дека денеска ќе биде воспоставен посебен режим на сообраќај во централното подрачје на Скопје поради одржување на атлетска трка.

Трасата на трката ќе се движи од паркот „Жена борец“, преку Камени мост, по улицата „Иљо Војвода“, мостот „Гоце Делчев“ и по кејот на реката Вардар, а потоа во обратна насока. За време на настанот, ќе биде затворена улицата „Иљо Војвода“, како и пешачките површини и делови од кејот по кои ќе се движат учесниците – соопшти МВР.

Од Единицата за безбедност на патниот сообраќај при СВР Скопје најавуваат дека ќе преземат мерки за пренасочување на сообраќајот по околните улици, со цел да се овозможи непречено и безбедно одвивање на трката.

МВР упати апел до граѓаните да ги почитуваат наредбите на полициските службеници и привремената сообраќајна сигнализација во зоната каде што ќе се одвива настанот.