Централната изборна Комисија (ЦИК) на Косово денеска одлучи да се повтори броењето на гласовите на 494 избирачки места на вонредните парламентарни избори што се одржаа на 14 февруари, јави дописникот на МИА од Приштина.

Портпаролот на ЦИК, Ваљмир Елези изјави дека на спорните избирачки места се забележани разни неправилности при евиденција на гласовите.

– Според ЦИК, пребројувањето ќе се изврши поради погрешно пренесување на гласови во формулари на политички субјекти (35 избирачки места); погрешно пренесување на гласови во формулари на кандидати (6 избирачки места); кандидатот или кандидатите имаат повеќе гласови од политичкиот субјект (370 избирачки места); и политичкиот субјект има добиено гласови, додека кандидатот не и обратно (83 избирачки места), информира Елези.

Косовските граѓани на изборите гласаа во 888 гласачки центри со 2.382 избирачки места, што значи дека пребројувањето ќе се изврши во околу 2,5 отсто од гласачките места.