Поради дојави за бомби, евакуирани дваесетина средни училишта во Белград
Дваесетина средни училишта и гимназии во Белград добија мејл за поставени бомби, по што учениците и професорите веднаш биле евакуирани. Српското МВР веднаш било известено.
„Слична ситуација се случи пред неколку дена во соседна Црна Гора. Нашата полиција прво ќе ги испита заканите, а децата и вработените нема да бидат вратени во училниците додека полицијата не потврди дека е безбедно, што е приоритет“, рече првиот вицепремиер и министер за образование Бранко Ружиќ.
Полицијата досега провери девет училишта на територијата на Белград и утврди дека станува збор за лажни дојави. Проверките продолжуваат, порачаа од Министерството за внатрешни работи на Србија.
„Влезе професорот по физика, само ни рече: „Имаме бомба во училиштево, мора да излеземе. Сите сме супер, еве сме пред училиште, само професорите се во паника и мислат дека е нешто сериозно“, изјави за Блиц ученик од Земунската гимназија.