Советот на Град Скопје денеска едногласно го усвои буџетот за 2026 година. Градоначалникот Орце Ѓорѓиевски соопшти дека буџетот е усвоен без ниту еден глас против и најави „засилен инвестициски циклус“.

„Им се заблагодарувам на сите советници што го поддржаа. Време е скопјани да живеат подобро, време е градот да застане на нозе и да оди напред“, напиша тој на Фејсбук.

Основниот буџет на Град Скопје за 2026 година изнесува нешто над 5,2 милијарди денари (околу 84,5 милиони евра), што претставува зголемување од 12,04 отсто во однос на годинава.

Капиталните инвестиции предвидени во основниот буџет изнесуваат околу 29 милиони евра и тие сочинуваат повеќе од една третина од вкупниот градски буџет. За споредба, според градоначалникот, во 2025 година капиталните инвестиции изнесуваа само 28,9 отсто од буџетот.

„Ова значи повеќе инфраструктурни зафати, повеќе проекти на терен и конкретни, видливи резултати за граѓаните“, додаде Ѓорѓиевски во објава на „Фејсбук“, испуштајќи да каже дека висината на сумата предвидена за капитални инвестиции сепак не значи автоматски дека тие пари и ќе се потрошат за проектите што ги спомнува.