Во населбата Фужине во Љубљана, локалната полиција употребила оружје и пукала кон маж, откако тој нападнал минувачи и полицајци со нож, пренесува „Словенске новице“.

Како што пишува медиумот, напаѓачот починал на местото на настанот, а подрачјето околу плоштадот меѓу банката и библиотеката е затворено.

На местото имало и полициски возила, пожарникари, како и истражен судија и криминалисти.

Драматичниот инцидент се случил денеска, а од полицијата од Љубљана го потврдиле редоследот на настаните.

„Мажот со ножот ги нападна полицајците. Тие го предупредувале да престане со нападот, но тој не ги послушал и им се заканувал“, изјави за медиумите директорот на Полициската управа Љубљана, Томислав Омеец.

Полицајците, како што објасни, за да одвратат противправен и непосреден напад врз сопствениот живот – употребиле огнено оружје.

„Огненото оружје е крајна мерка што полицијата ја користи само во случаи кога животот е непосредно загрозен. Во согласност со стандардните процедури, полицијата ќе ги спроведе сите потребни активности за проверка на законитоста на употребата на присилните средства и за разјаснување на сите околности на настанот“, рекол Омеец.