МВР се пофали дека неговите органи на редот вчера уапсиле 12-мина посетители на забава кај гевгелиското село Миравци, откако кај нив или во нивните автомобили била пронајдена дрога. Меѓу уапсените рејвери, седуммина се од Скопје, соопшти полицијата.

Полицајците цели пет часа вршеле контроли на патот меѓу Миравци и „Бел Рај“, а резултатот е следниов плен: марихуана (количеството не е наведено) и четири таблети за кои МВР појаснува дека биле со „виолетова боја“.

„На 25/26.07.2025 во времето од 22.00 до 03.00 часот на локален пат од село Миравци кон место викано „Бел Рај“, гевгелиско, полициски службеници од СВР Струмица-ОВР Гевгелија ги лишиле од слобода Б.Ј.(25), С.Н., М.К.(31), Н.М.(20), А.И.(24), Ф.П.(22) и Д.Б.(34) сите од Скопје, Г.А.(21) и Т.Ј.(38) и двајцата од Кавадарци, К.П.(21) од Неготино, П.З.(38) од Радовиш и Е.Ј.(22) од Берово. Во осум поединечни случаи при преглед на лицата или во возилата во кои се превезувале биле пронајдени марихуана и четири таблети виолетова боја“, пишува во соопштението.

За последната акција која одлично ја илустрира решителноста со која МВР пристапува кон борбата против дрогата, известено е и Јавното обвинителство, па сите уапсени ќе добијат соодветни пријави, додаваат од МВР.