Францускиот фудбалер Пол Погба сè уште го чека својот деби настап за Монако, откако повторно се здоби со повреда — овој пат на скочниот зглоб.

Поранешниот ас на Јувентус последен натпревар одигра во 2023 година, пред да биде суспендиран поради допинг. По истекот на суспензијата, Погба се врати на тренинзи и потпиша за Монако, но неговото деби повторно се одложува.

Тренерот Себастијан Покоњоли потврди дека Погба ќе го пропушти и дуелот против Пари Сен Жермен.

„Чекаме потврда за тежината на повредата. Зглобот му се искриви, но останува да видиме колку сериозно е. Не беше на 100% за да тренира денес“, изјави Покоњоли.

Тој додаде дека се надева Погба ќе се врати на терен веднаш по репрезентативната пауза.

Монако моментално се наоѓа на второто место во Лига 1 со 20 бодови, но фановите сè повеќе губат трпение за „стаклениот Пол“, како што француските медиуми го нарекуваат фудбалерот поради неговата склоност кон повреди.