Напишана во класичен и во слободен стих, поезијата на Ана Пејчинова е посветена на невидливото: на природата и сенките, на патниците и пределите, на миговите и соништата, на молчеливите нешта што се светилишта на суштина. Во спој на лирика и метафизика, хумор и духовност, љубов и смртност, збирката отвора премин меѓу светови: сонот и јавето, живиот и неживиот свет, митот и современоста, минливоста и вечноста.

„Чувари на малите нешта“ е избор од необјавени стихови на авторката напишани во периодот 2002 – 2025, додека патувала, пишувала и молчела. Изборот не ќе беше возможен без двајцата уредници на збирката: Наташа Атанасова и Никола Маџиров, а печатеното издание доаѓа благодарение на издавачката куќа „Или-или“.

Оваа поезија е и засолниште и манифест на сè што е тивко и суштинско. Ние сме „чувари“, градители, создатели на убавина, но и нас нешто нè чува, гради и преобразува. „Чувари на малите нешта“ пее со меланхолична, „тврдоглава“ верба. Со едноставен јазик и со нежна метафизичност. Стиховите на Пејчинова нè повикуваат да сопреме во овој бучен, забрзан свет, да се завртиме кон невидливото и да го сочуваме, како што тоа, невидливо, нè чува нас.

Ана Пејчинова (1973) има разновидно творечко и професионално портфолио во областа на книжевноста, визуелните уметности, филозофијата, психологијата, политичките науки, меѓународниот развој и хуманитарната помош.

Родена е во Скопје, со повеќегодишни студии, работа и патувања во триесетина земји на пет континенти на светот. Дипломира Општа и компаративна книжевност на Филолошкиот факултет при Универзитетот „Св. Кирил и Методиј“ (1995), докторира на Катедрата за компаратистика при Карловиот универзитет во Прага (2002), а магистрира политички науки на Централноевропскиот универзитет во Будимпешта (2006).

Има објавено три збирки поезија: „Деогае“ (1995), „Ѕверот и проѕирот“ (1997) и „Златните раце на демонот“ (1999), како и збирка раскази „Авгански дневници“ (2008). Добитник е на наградата „Млада Струга“ (1995) и на други признанија. Нејзини песни се преведени на полски, германски, англиски, француски, фински, српски и други јазици. Како книжевен преведувач, има објавено препеви на значајни автори, главно од англиски јазик.

(Текстот е објавен во „Културен печат“ број 303, во печатеното издание на весникот „Слободен печат“ на 18-19.10.2025)