Македонската поетеса, писателка и преведувачка Наташа Сарџоска деновиве гостуваше на меѓународен поетски фестивал и симпозиум посветен на темата „Доверба во книжевноста“, што се одржа во италијанскиот град Бари, на покана на Меѓународното движење „Жени и поезија“.

На фестивалот Сарџоска настапи со читање на своја поезија на македонски и на италијански јазик, а учеството го сподели со поети од Уругвај, Шпанија, Италија, Полска и Ерменија и музичари и сликари од Италија.

Во рамки на симпозиумот, Наташа Сарџоска одржа воведно предавање на италијански јазик, претставувајќи историски, културолошки и книжевен преглед на современата македонска женска поезија.

По тој повод, таа прочита и песни во свој превод на италијански јазик од првите македонски поетеси Евгенија Шуплинова и Даница Ручигај, како и од Светлана Христова-Јоциќ, Ката Мисиркова-Руменова, но и од современите Весна Ацевска и Ана Голејшка-Џикова, доближувајќи ја македонската поетска традиција и современото поетско творештво до разноликата италијанска и меѓународна поетска, музичка и читателска публика.