Почина првата кандидатка за Оскар со афроамериканско потекло
Легендарната актерка Сисели Тајсон, првата Афроамериканка која беше номинирана за престижната награда Оскар, почина вчера на 96-годишна возраст.
Оваа информација ја потврди нејзиниот долгогодишен менаџер Лери Томпсон, а причината за смртта се уште не е позната.
Актерката ќе остане запаметена по долготрајната и богата кариера, а особено по номинацијата за Оскар за улогата во филмот „Sounder“, како и по наградите Тон и Еми.
Таа се избори за правата на оваа популација, а нејзините улоги во филмовите беа разновидни, од робинка, активистка за човекови права, деловна жена, борец за вистината, мајка и уште многу други. Во секој лик таа внесуваше еден вид на длабочина, посебни емоции, грациозност…
Нејзината филмографија ги вклучува некои од најпознатите филмови и телевизиски емисии во кои значајни улоги имаат Афроамериканките како “Sounder”, “The Autobiography of Miss Jane Pittman”, “Roots”, “The Marva Collins Story”, “The Women of Brewster Place” и “The Help”.
Сепак, во неколку наврати Сисели истакна дека нејзиното најголемо достигнување било во 2016 година, кога тогашниот американски претседател Барак Обама и го доделил Медалот на слободата.
„Во својата долга и извонредна кариера Сисели Тајсон не само што ја надмина улогата на актерка, туку таа го обликуваше и текот на историјата“, изјави Обама тој ден.
„Јас сум едно од трите деца кои пораснаа во подрачјето кое денес е познато како Ел Барио, а тоа беше источната страна на Њујорк. Од тоа место да дојдам во Белата куќа и првиот претседател Афроамериканец да ми стави медал околу вратот, па што повеќе би можела да посакам од тоа“, изјави актерката тогаш.
Таа е родена на 19 декември 1924 година во Њујорк. Се школувала на Универзитетот во Њујорк.
„Секогаш одев чекор понатаму, се обидував да ги откријам работите, да истражувам и да учам“, беа нејзините зборови.
На Фејсбук од неа се прости и поранешната американска прва дама, Мишел Обама.