Легендарниот фудбалер на Челси, Боби Тамблинг, почина вчера на 84-годишна возраст. Тој е вториот најдобар стрелец во историјата на лондонскиот клуб со 202 гола, рекорд кој го држеше повеќе од четири децении сè додека не беше надминат од Френк Лампард.

Тамблинг играше за Челси од 1959 до 1970 година и постигна импресивни 202 гола на 370 натпревари во тој период. Повеќе од четири децении, тој го држеше рекордот за најдобар стрелец во историјата на клубот, сè додека Френк Лампард не го надмина во 2013 година. Сепак, еден од неговите подвизи остана недостижен, Тамблинг е сè уште единствениот играч на Челси кој постигнал пет гола на еден натпревар, што му успеа во 1966 година против Астон Вила.

Тамблинг своето деби за Челси го имаше на 17-годишна возраст, но и покрај одличните игри на клупско ниво, одигра само три натпревари за репрезентацијата на Англија и остана без место во тимот што го освои светското првенство во 1966 година.

Тамблинг во својата играчка кариера настапуваше и за Кристал Палас и ирски Корк.